شنبه , اګست 19 2017
کور‌پاڼه / سرمقاله / د بغلان وروستۍ پېښه؛ د اسلاميت، افغانيت او انسانيت پر خلاف جنايت او بس.

د بغلان وروستۍ پېښه؛ د اسلاميت، افغانيت او انسانيت پر خلاف جنايت او بس.

په بغلان ولايت كې د سكرو د كان د كارګرو وژنه له جنايت او وحشت پرته نه بل نوم لري نه بل تعبير، دا له افغان دښمنۍ، اسلام دښمنۍ او انسان دښمنۍ پرته بل تعريف هم نه لري.

د بې ګناه كارګرو دغه وژنه زموږ ولس ته د خطر زنګ دى، حكومت او چارواكيو ته لوى ګواښ دى، او دا ساده مساله هېڅكله نه ده چې څو ځله زموږ د يوه قوم عام وګړي داسې په بې رحمۍ او قساوت وژل كېږي.

د دې وژنو معنا دا ده چې هېواد مو د يوې بدمرغې توطيې ګرداب ته لويدلى دى، كه ولس او چارواكي غفلت وكړي په لويه غميزه بدلېداى شي.

دلته د افسوس ځاى دا دى چې چارواكي دغه ډول پېښو ته ساده توجيه لري، ګواكې د هېواد د دښمنانو كار دى! دوى معمولاً دغسې پېښې غندي او له غمځپليو كورنيو سره خواخوږۍ او همدردۍ ښيي. خو يوازې د خواخوږۍ په پيغامونو د ولس درد نه دوا كېږي، يوازې په غندلو دغه غميزه نه ختمېږي، موږ به تر څو يوازې دا اورو چې (نور موږ ته داسې جنايات د زغم وړ نه دي!) دا دي وينو چې د همدې كليشه يي او بې معنا پيغامونو له خپرېدو سره د دغه ډول جناياتو بهير دوام لري.

اوس خو پر دې فكر په كار دى چې د هېواد له غېږې د وير او ماتم د دغه بهير د ختمولو لپاره يوې نوې لارې او نوښت ته اړتيا ده.

دا نه د ساده طالب كار دى او نه په ټوله كې دغه ستونزه او توطيه افغاني ده، چې كله مو د سر سړي يو يو را نه اخلي، كله مو د  قومي دښمنيو لنبو ته ورټېل وهي او كله مو په سياسي ډګر د ډېرو بې هويته او بې ارزښته څېرو په لاسو كې لوبوي.

ولس او په ټوله كې د ولس پوه او باضميره پاړكي ته په كار ده چې د توطيې څرنګوالى درك كړي، له يوه پلوه د ملي يووالي په روحيه د قومي ټيكه دارانو شرارتونو ته پام وكړي چې د شريك كور په منځ كې له دې پېښو د خپل بازاري سياست د تودولو هڅه ونه كړي، بل لور ته په ګډه يو داسې خوځښت رامنځته شي چې ولس مو د پرديو د حضور په باب پر واقعيتونو ولاړ دريځ غوره كړاى شي. تر هر څه ړومبى بايد زموږ ولس پر دې وپوهول شي چې د بغلان د وروستۍ پېښې په څېر جنايات د افغان او مسلمان كار نه دى، دا د هېڅ قوم اوهېڅ يوه سياسي او مذهبي پاړكي په ګټه نه دى، دا د اسلام او انسانيت خلاف عمل دى، بايد ولس يې له يوې توطيې پرته بل څه ونه ګڼي.

دا وګورئ

زموږ پر هېواد د پرديو د شوم سيوري شومې پايلې

د بلخ د والي د شخصي ساتونكيو لخوا د بلخ د هوايي ډګر كلابندي او ...

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *