دوشنبه , دسمبر 11 2017
کور‌پاڼه / افغانستان / ولسمشر غني: راتلونکی میلادي کال به د افغانستان او ازبکستان لپاره د ګډو همکاریو له پلوه خورا مهم وي

ولسمشر غني: راتلونکی میلادي کال به د افغانستان او ازبکستان لپاره د ګډو همکاریو له پلوه خورا مهم وي

 

د دواړو هېوادونو ترمنځ د تجارت، ټرانزیټ، امنیت، اقتصاد، ګمرکونو، روغتیا، لوړو زده کړو او يو شمېر نورو برخو کې د ګډو همکاریو ۲۱ تړونونه لاسلیک شول

تاشکند – ولسمشر محمد اشرف غني وايي چې راتلونکی میلادي کال به د افغانستان او ازبکستان لپاره د ګډو همکاریو له پلوه خورا زیات مهم کال وي.

ولسمشر غني پرون له خپل ازبکستاني سیال سره په تاشکند کې په يوه ګډه خبري ناسته کې د دواړو هېوادونو ترمنځ اقتصادي اړيکې مهمې وبللې او په ۲۰۱۸ميلادي کال کې د دواړو هېوادونو ترمنځ د ګډو همکاریو پر پراختیا يې ټینګار وکړ.

هغه وویل: “زما وړاندیز دا دی چې ۲۰۱۸ ميلادي کال دې د دواړو هېوادونو ترمنځ د ګډو همکاريو لپاره ډېر مهم او عملي کال وي، افغانستان غواړي چې ازبکستان يې د سوداګرۍ او ټرانزیټ په برخه کې يو مهم ملګری او همکار وي.”

افغان چارواکو له خپلو ازبکستاني سیالانو سره د تجارت، ټرانزیټ، امنیت، اقتصاد، ګمرکونو، روغتیا، لوړو زده کړو او يو شمېر نورو برخو کې د ګډو همکاریو ۲۱ تړونونه لاسلیک کړل.

بلخوا د ازبکستان ولسمشر شوکت میرضیایف د افغان ولسمشر دغه سفر تاریخي وباله او په بېلابېلو برخو کې یې د دواړو هېوادونو ترمنځ د اړیکو پر پراختیا او ګډې همکارۍ ټينګار وکړ.

نوموړي وویل: “دغه سفر موږ ته تاریخي اهمیت لري، په ځانګړې توګه د دواړو هېوادونو ترمنځ د ټرانزیټ او سوداګرۍ په برخه کې چې له دې لارې د د دواړو هېوادونو ترمنځ اقتصادي اړیکې لا پراخې شي.”

د یادلو ده چې اوس‌مهال د دواړو هېوادونو ترمنځ د سوداګرۍ کچه ۳۵۰ میلیونه ډالرو ته رسېږي او هڅه کېږي چې په نږدې راتلونکې کې دا رقم یو میلیارد ډالرو ته ورسېږي.

دا وګورئ

مشرانو جرګه: حکومت دې له واشنګټن سره امنيتي تړون لغوه کړي

  له امريکا سره شوی امنيتي تړون د امنيت په ټينګښت کې ګټور نه دی ...

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *