دوشنبه , فبروري 19 2018
کور‌پاڼه / افغانستان / ولسي جرګې ۱۱ نوماند وزیرانو ته د باور رایه ورکړه

ولسي جرګې ۱۱ نوماند وزیرانو ته د باور رایه ورکړه

ولسي جرګې د حکومت له لوري د ۱۲ ورپېژندل شویو نوماندانو له ډلې ۱۱ تنو ته د تاييد رایه ورکړه، خو پر یوازينۍ ښځينه نوماندې نرګس نهان یې باور ونه کړ او رد یې کړه

ولسمشرۍ ماڼۍ وړمه شپه د ولسي جرګې غړي ارګ ته وربللي وو او داسې ښکاري چې نوماندانو ته د رایې ورکولو په برخه کې جوړجاړی شوی دی (کارپوهان)

کابل – ولسي جرګې د حکومت له لوري د ۱۲ معرفي شویو نوماند وزیرانو له ډلې ۱۱ تنو ته د تائيد رایه ورکړه او د کانونو او پټرولیم وزارت پر یوازينۍ ښځينه نوماندې نرګس نهان یې باور ونه کړ او رد یې کړه.

ولسي جرګې پرون د حکومت له خوا ورپېژندل شویو ۱۲ نوماندو وزیرانو ته د رایې ورکولو صندوقونه کېښودل. د دغې جرګې په پرونۍ غونډه کې ۲۲۳ وکیلان حاضر وو او هر نوماند وزیر د وزارت د څوکۍ ترلاسه کولو لپاره ۱۱۲ مثبتو رایو ته اړتیا درلوده چې د رايې ورکولو په پای كې ۱۱ نوماند وزیرانو د اړتیا وړ د باور رايې وګټلې.

د ولسي جرګې رئیس عبدالروف ابراهيمي بریالیو وزیرانو ته د مبارکۍ ترڅنګ له هغوى غوښتنه وکړې چې خپلې کړې ژمنې عملي کړي.

د بریالي شویو وزیرانو له ډلې د ملي دفاع وزارت ته نوماند طارق شاه بهرامي ۱۴۱، د کورنيو چارو وزارت ته نوماند ويس احمد برمک ۱۷۳، د کرنې وزارت ته نوماند نصير احمد دراني ۱۴۴، د کليو د بيارغونې او پراختيا وزارت ته نوماند مجيب الرحمن کريمي ۱۲۹، د ټولګټو چارو وزارت ته نوماند يما ياري ۱۵۶، د کار او ټولنيزو چارو وزارت ته نوماند فيض الله ذکي ۱۲۶، د ټرانسپورټ وزارت ته نوماند حميد طهماسي ۱۴۹، د لوړو زده کړو وزارت ته نوماند نجیب الله خواجه عمري ۱۲۴، د قومونو او قبایلو چارو وزرات ته نوماند محمد شفیق ګل اغا شېرزي ۱۵۸، د مخابراتو او معلوماتي ټکنالوژۍ وزارت ته نوماند شهزاد ګل اریوبي ۱۱۵ او د اقتصاد وزارت ته نوماند مصطفی مستور ۱۵۵ د باور رايې وګټلې، خو نرګس نهان چې د کانونو او پټرولیم وزارت ته نومانده وه، د ۱۰۷ تاييد رايو په خپلولو سره ونه توانېده چې ۵۰ جمع یو رايې پوره كړي او یاد وزارت ته بریالۍ شي.

ولسمشر غني د ولسي جرګې د پرونۍ رايې اچونې هرکلی کړی او له دې جرګې يې مننه کړې چې ورپېژندل شویو وزیرانو ته يې د باور رایه ورکړه. د ولسمشر ویاند شاه حسین مرتضوي دا د حکومت لپاره یوه ستره بریا وبلله او هرکلی یې وکړ.

خو کارپوهان بیا وايي، ولسمشرۍ ماڼۍ وړمه شپه د ولسي جرګې غړي ارګ ته وربللي وو او داسې ښکاري چې نوماندانو ته د رایې ورکولو په برخه کې جوړجاړی شوی دی.

د یادولو ده چې د ولسي جرګې له لوري د یو شمېر وزیرانو له سلب اعتماد کېدو نږدې یو کال وروسته بالاخره د ۱۱ وزارتونو لپاره نومول شویو نوماندانو له يادې جرګې څخه د تایید رایه ترلاسه کړه.

دا وګورئ

ملي مشارکت ګوند: تش په نوم رهبران د افغانانو ترمنځ نفاق ته لمن وهي

  په افغانستان کې روان وضعیت له بل هر وخت څخه ډېر بحراني شوى، اړتیا ...

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *