پنجشنبه , اکتوبر 19 2017
کور‌پاڼه / افغانستان / افغانستان له پاکستانه د پنځو لوړپوړو طالب بندیانو د ورسپارلو غوښتنه کړې

افغانستان له پاکستانه د پنځو لوړپوړو طالب بندیانو د ورسپارلو غوښتنه کړې

په دغو پنځو طالب بندیانو کې ملا عبدالغني برادر، ملا عبدالمنان نانی، ملا عبدالصمد ثاني او ملا سلیمان اغا هم شامل دي (اېکسپرېس ټرېبيون)

کابل – د افغانستان د ملي امنیت شورا وايي، له پاکستاني چارواکو یې غوښتي چې د طالبانو د ډلې هغه پنځه لوړپوړي چارواکي افغان حکومت ته وروسپاري چې دمګړۍ په پاکستان کې بندیان دي.

افغان او پاکستاني چارواکو د دواړو هېوادونو ترمنځ د سولې خبرو پیلولو په موخه یو لړ شرطونه یو بل ته وړاندې کړي چې یو یې د بندیانو راکړه ورکړه ده.

د افغانستان د ملي امنیت شورا ویاند قادر شاه وايي، څو ورځې مخکې د ملي امنیت شورا سلاکار محمد حنیف اتمر په نیویارک کې د ملګرو ملتونو عمومي غونډې په څنډه کې د پاکستان د بهرنیو چارو له وزیر خواجه محمد اصف څخه د پنځو طالب بندیانو د خوشې کېدو او افغان حکومت ته یې د ورسپارلو غوښتنه کړې وه.

که څه هم د ملي امنیت شورا ویاند د دغو طالب بندیانو نومونه یاد نه کړل، خو پاکستانۍ ورځپاڼې اېکسپرېس ټرېبیون د دوى له ډلې د څلورو كسانو ملا عبدالغني برادر، ملا عبدالمنان ناني، ملا عبدالصمد ثاني او ملا سلیمان اغا نومونه په ډاګه كړي دي.

ویل کېږي افغان حکومت ته د دغو طالب بندیانو په ورسپارلو سره د دواړو هېوادونو ترمنځ د سولې خبرو پیلولو ته لار هوارېږي.

د ملي امنیت شورا وايي، د افغانستان او پاکستان ترمنځ د سولې خبرو پیلولو لپاره دواړو هېوادونو یو بل ته بېلابېل موضوعات وړاندې کړي چې په پام کې ده پر وړاندې شويو موضوعاتو به په را روانه اونۍ کې د افغانستان، پاکستان، چین او امریکا ترمنځ په ګډه ناسته کې چې د عمان په پلازمېنې مسقط کې جوړېږي، بحث وشي.

دا وګورئ

د ملي شورا غړي: د امریکا د نوې ستراتېژۍ تر اعلان وروسته ملکي مرګ ژوبله زیاته شوې

  ‌په هرات، کندز، ننګرهار او کونړ ولایتونو کې شپږ ځله پر ملکيانو بمبارد شوی ...

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *